zgjohu.com.mk | Lëvizja Qytetare ZGJOHU! - Shkup

Heshtja e vërtetë është paqë për trurin, për shpirtin është si gjumi për trupin, por për Institutin - heshtja është gjendje kome

Ka kohë që Lëvizja ZGJOHU! po shqyrton mundësinë e themelimit të Institutit të Heshtjes Kombëtare për diskriminim kulturor dhe shpirtëror të shqiptarëve në Maqedoni. Me gjasë, ky Institut do të bëjë më shumë punë se sa Instituti për Mbrojtjen e Trashëgimisë Kulturore dhe Shpirtërorë të Shqiptarëve në Maqedoni "Pjetër Bogdani". Edhe po mos të bëjë as edhe të vetmën gjë, përsëri do të ketë bërë më tepër.

Vendin drejtues në Institutin e Heshtjes pa dyshim duhet ta ketë Instituti Pjetër Bogdani. Në ditët kur fryma shqiptare në Shkup po shfaroset me bulldozher dhe trashëgimia kulturore dhe shpirtërore po zhduket para syve tanë, të gjitha institucionet më të thirura shqiptare, të prira nga Instituti, heshtin. Instituti heshti edhe kur fëmijëve tanë iu imponua gjuha maqedonase. Instituti heshti edhe kur Enciklopedia falsifikoi gjithë historinë shqiptare, na quajti malësorë dhe ardhacak. Ndoshta Instituti është mbështetur në populloren “heshtja është flori” duke shpresuar në përfitime të çfarëdo lloji. Kur drejtuesit e Institutit u bindën që heshtja nuk u sjell ndonjë përfitim, vendosën që të bëjnë zhurmë rreth buxhetit për rroga dhe për veturë zyrtare. Dhe përsëri iu kthyen veprimtarisë së parapëlqyer, heshtjes.

Instituti po ngulfatet nga paaftësia e menaxhimit, nga mungesa e vizionit, nga mungesa e guximit, por edhe nga mungesa e iniciativave kreative nga stafi dhe drejtuesit që paguhen për ta mbrojtur qenien shqiptare në Maqedoni.

Instituti Albanologjik i prin institucioneve dhe subjekteve shqiptare që qëndrojnë të shurdhër ndaj rrahjes alarmante të kambanave për diskriminin kulturor dhe shpirtëror kundër shqiptarëve që ka arritur kulminacionin. Kjo politikë diskriminuese ka prishur çdo mundësi urëzimi të qëndrimeve midis dy komuniteteve më të mëdha në vend.

Koha është e pamëshirshme dhe kombi shqiptar nuk mund të viktimizohet për paaftësinë individuale ose mungesën e frymëzimit. Kjo vlen për të gjitha institucionet që drejtohen nga shqiptarët. Nëse nuk ju punohet ose nuk dini si ta bëni punën, largohuni ditë më parë. Ky do të ishte akti më patriotik që do ta kishit ndërmarrë në këto rrethana sfiduese që nuk tolerojnë paaftësi. Populli ka nevojë për prijës të guximshëm.

Këndjellja e shqiptarëve në Maqedoni është e mbrapshtë. Qytetarët e thjeshtë arrijnë të krijojnë opinion publik dhe janë shumë më të vetëdishëm për fatin e popullit se sa intelektualët. Shumica e popujve udhëhiqen nga mendjet e ndritura, por neve na rastisi fati të kemi popullin më të ndritur se vetë mendjet e veta që pretendojnë të janë të ndritura. Shoqëria shqiptare po ndryshon, po evoluon dhe nëse prijësit intelektual dhe politik nuk mund t'a mbajnë hapin me popullin duhet të tërhiqen dhe mos t'i mbajnë peng qytetarët dhe ardhmërinë e kombit.

Cili është proçesi i fundit politik dhe zhvillimor që ka gjetur nismë tek intelektualët shqiptar? Ndoshta do t'a gjeni përgjigjën nësë arrini t'a gjeni vrimën se ku janë strukur ata. Të nderuar, dilni nga gëzhoja mbrojtëse me të cilën jeni rrethuar dhe prini popullit sepse kemi nevojë për ju.

Gjitha këto pasoja që po i ndjejmë sot janë rezultat i devijimit të qëllimshëm nga vlerat e mirëfillta në politikbërjen shqiptare. Politika shqiptare ka gisht të drejtëpërdrejt në shuarjën e intelektualëve dhe promovimin e dëgjueshmërisë dhe përkuljes si vlerë në politikë dhe shoqëri. Dhe fatmirësisht për partitë, njerëz të tillë ka më bollëk, por fatkeqësia për popullin është që po ata njerëz na kanë marrë në qafë gjithë këto vite. Poltronizmi dhe mosdija e tyre ka parandaluar marrjen e hisës dhe institucionalizmin e shqiptarit në institucionet shtetërore si dhe ka shuar zërin kritik tek shqiptarët. Andaj, urojmë që virusi i këndelljes së qytetarit të thjeshtë të kaplojë edhe udhëheqësit politik dhe intelektualët sa më shpejtë sepse deri sa ata të zgjohën ne mund të fillojmë me palosjen e valixheve sepse Shkupi jonë po tjetërsohet, po na bëhët i huaj.

Ka raste kur heshtja është shumë e zëshme, por në rastin e Institutit Albanologjik heshtja është shurdhëruese. 

Lëvizja Qytetare ZGJOHU!

22 shkurt 2010

Nga qytetin që dikur njihej me emrin Shkup