zgjohu.com.mk | Lëvizja Qytetare ZGJOHU! - Shkup

Lëvizja Qytetare ZGJOHU! mirëpret opinionin këshilldhënës për të konfirmuar ligjshmërinë e shpalljes së pavarësisë së Kosovës nga ana e Gjykatës Ndërkombëtare të Drejtësisë në Hagë.

Lëvizja ZGJOHU! konsideron që ky vendim i Gjykatës është vendimi i vetëm i drejtë për rastin e Kosovës dhe është meritë e sakrificës së popullit shqiptar për liri dhe demokraci në Kosovë që u mbështet pa rezervë nga bota e civilizuar duke i vënë fund gjenocidit të Millosheviqit ndaj popullit shqiptar.

Edhepse opinioni i GJND-së nuk është i detyrueshëm dhe ka vetëm fuqi këshilluese, Lëvizja ZGJOHU! gjykon që ky opinion përfundimisht vulos pavarësinë e Kosovës duke mundësuar njohjen e statusit edhe nga vendet tjera si dhe kontribuon në stabilitetin e qëndrushëm në Ballkanin perendimor duke mundësuar hapërimin e papenguar drejt BE dhe NATO të të gjitha vendeve të rajonit.

Lëvizja ZGJOHU! përgëzon popullin shqiptar të Kosovës duke i ftuar autoritetet që t’a arsyetojnë besimin dhe mbështetjen e komunitetit ndërkombëtar për ndërtuar një Kosovë aspirante të denjë për integrim në Bashkimin Evropian dhe në NATO dhe partnere të vendeve demokratike.

Ky opinion këshilldhënës i Gjykatës Ndërkombëtare të Drejtësisë duhet t’i hap mundësinë Kosovës që të anëtarësohet në familjen e madhe të Kombeve të Bashkuara nëpërmjet njohjeve të reja që padyshim do të vijnë në ditët e ardhshme. Lëvizja ZGJOHU! gjithashtu fton Sërbinë që të drejtoj orientimin e vet politik në drejtim të Brukselit dhe të heq dorë nga politika destruktive që po mban peng gjithë Ballkanin perendimor.