zgjohu.com.mk | Lëvizja Qytetare ZGJOHU! - Shkup

Lëvizja Qytetare ZGJOHU! shpreh hezitimin e saj rreth dokumentarit të pregaditur në Shkup nga gazetari i mirënjohur i CNN, Nic Robertson, në lidhje me 100 vjetorin e lindjes së Nënës Terezë.

Sipas informatave të plasuara në media, z. Robertson është takuar me kryefalsifikatorin e emrit dhe veprës së Nënës Terezë, Stojan Trençevski nga shoqata Shkupjanja Nëna Terezë, i cili shpifi kombësinë shkupjane të Gonxhe Bojaxhiut dhe vazhdon të kryejë misionin e tij të de-shqiptarizimit të Nënës Terezë.

Gjatë ditës së sotme, Lëvizja ZGJOHU! ka vendosur kontakt të drejtpërdrejt me gazetarin e CNN Nic Robertson për të shprehur shqetësimet e veta dhe për t’a informuar rreth të gjitha zhvillimeve në lidhje me tendencën për të falsifikuar përkatësinë kombëtare shqiptare të Nënës Terezë, dislokimin e shtëpisë së lindjes së saj, ndërtimit të kishës ortodokse mbi atë shtëpi si dhe shumë padrejtësi tjera që bëhen me faktet që çartazi e identifikojnë Nënën Terezë si një shqiptare, bijë të botës mbarë.

Duke marrë parasysh të gjitha përpjekjet për të zhdukur elementet shqiptare nga sheshi i Shkupit dhe për të përvetësuar figurën e Nënës Terezë, ZGJOHU! ka dorëzuar pranë Sekretatiatit për Implementimin e Marrëveshjes së Ohrit një proekt grandioz për të shënuar 100 vjetorin e lindjes së Gonxhe Bojaxhiut në koordinim me aktivitet që do të ndërmirren në Tiranë dhe në Prishtinë. Urojmë që ky proekt të gjejë mbështetje ditë më parë dhe kjo është mënyra më e mirë për të shënuar denjësisht 100 vjetorin e bijës së madhe të kombit shqiptar.