zgjohu.com.mk | Lëvizja Qytetare ZGJOHU! - Shkup

Me rastin e përvjetorit të vdekjes së heroit tonë kombëtar Gjergj Kastriot Skënderbeu, Lëvizja Qytetare ZGJOHU!, më 17 janar 2007, në shenjë respekti për veprën dhe jetën e kryetrimit shqiptar, vendosi lule të freskëta pranë monumentit të Skënderbeut në Çarshi të Vjetër të Shkupit. Fotografi nga kjo ngjarje do të vendosen së shpejti në foto galerinë tonë.

Në janar të vitit 1468 Skënderbeu u sëmur gjatë zhvillimit të një Kuvendi të thirrur nga ai, në të cilin ishin të ftuar të gjithë princat shqiptarë. Vdiq me 17 Janar 1468 në Lezhë.I mbuluar me lavdi, ai u varros në Lezhë.

Zgjedhjet për Kryetar dhe Këshill të komunës së Sarajit të 14 janarit duhet të dëshmojnë pjekurinë demokratike të qytetarëve të Sarajit dhe të rikonfirmojnë synimet tona kombëtare për integrime Evro-Atlantike.

Lëvizja Qytetare ZGJOHU! Shkup është e bindur që qytetarët dhe partitë politike shqiptare kanë vullnetin dhe kapacitetin e duhur për të zhvilluar zgjedhje në përputhje me standardet ndërkombëtare.

Gjithashtu, ZGJOHU! Shkup fton të gjithë qytetarët e komunës së Sarajit që të ushtrojnë të drejtën e tyre të pacënueshme demokratike për të votuar duke respektuar parimin e një vote për një person.

Lëvizja Qytetare ZGJOHU! Shkup në veçanti fton 2 partitë kryesore politike shqiptare, PDSH dhe BDI, që të angazhohen për zhvillimin e drejtë, të qetë dhe demokratik të zgjedhjeve lokale në vend dhe në mënyrë dinjitoze të vulosim rrugën tonë drejt Evropës së Bashkuar dhe NATO-s.

09 janar 2007,

Shkup