zgjohu.com.mk | Lëvizja Qytetare ZGJOHU! - Shkup

"Politikanët janë të njejtë, gjithandej.  Premtojnë ndërtimin e urës edhe aty ku nuk ka lum." Nikita Khrushchev

Të nderuar, politika, thotë njëri, është arti i kërkimit të belasë, gjetjen e belasë edhe aty ku nuk ekziston, diagnostifikimin jokorrekt dhe përdorimin e ilaçit të gabueshëm. Kjo qeveri dhe doktrina e saj e ka emrin bela. Bela me fqinjët, bela me proçeset integruese, bela me investitorët e huaj, bela me komunitetet fetare dhe së fundi, atë më të keqën, bela me shqiptarët.Çdo përmendje e diskriminimit kulturor, ekonomik, gjyqësor, arsimor, social, etnik ndërlidhet drejtëpërdrejt me shqiptarët të cilët mbajnë të drejtën ekskluzive e të qenurit qytetar i rendit të dytë në Maqedoni dhe fajtor kujdestar për të gjitha dështimet e vendit. Andaj të dashur miq, le t'a rikthejmë reagimin tonë si shqiptar tash kur e pamë që reagimet tona si të integruar, si multikulturor, politikisht korekt dhe si çdo gjë tjetër përveq se shqiptar -dështuan. Pjesa e kombit shqiptar që jeton në Maqedoni ka bërë sakrificën më të madhë duke u pajtuar me pavarësinë e Maqedonisë me çmim të largimit nga prehëri i Beogradit, ridrejtimit të timonit shtetëror kah civilizimi perendimor dhe integrimit euroatlantik të vendit. Krahas sakrificës sublime të pjesës së kombit shqiptar që jeton në Maqedoni dhe barabarësisë së garantuar kushtetuese, shteti vazhdon t'i trajtojë si qytetarë të rendit të dytë. Qysh nga pavarësia e gjer më sot, shqiptarët janë viktima të proçeseve të montuara politike dhe edhe pse të pafajshëm, dergjen nëpër burgje. Filozofi romak Qiuntillianus (35-96) duke folur për problemet në gjyqësi thotë sе ato mund të zbërthehen nëse u jepet përgjigje pyetjeve: Kush? Çka? Ku? Kur? Si? Pse? dhe Me cilat mjete? Në Maqedoninë e sotme, problemet gjyqësore zbërthehen me fjalëkalimin "shqiptar". Çdo rast gjyqësor që zbërthehet me këtë fjalëkalim përfundon me dënim drakonik qoftë nëse edhe dëshmohet e kundërta, si në rastin e Sopotit, Bit Pazarit, Gostivarit, aferës së armëve, Tetovës, Ladorishtit, dhe nuk ka fund kjo listë. Së fundi, riaktivizohet bomba e tempuar e quajtur dosjet e rikthyera të Hagës si thupra politike për të disciplinuar shqiptarin që kohë pas kohë shfaq tendenca për t'u larguar nga prehëri dhe ninulla e partnerit maqedonas dhe të fillojë t'a përdor kokën. Tribunali Ndërkombëtar për Krime Lufte në ish Jugosllavi nuk e pa të arsyeshme dhe të nevojshme të nis procedurë gjyqësore për katër dosjet që prokuroria e Maqedonisë ia servoi si krime lufte në të cilat akuzohen ekskluzivisht forcat e UÇK-së. Edhepse autoritetet vendase paraqitën vetëm raste ku akuzoheshin shqiptarët, Prokuroria e Hagës vendosi që mos të përfillë asnjë prej tyre dhe u morr me rastin e Lubotenit të cilin Haga e klasifikoi si krim lufte ndërsa prokurorët Maqedonas as që kishin nisur hetimet për këtë rast.
Sot, duke mospërfillur Ligjin për amnisti të miratur nga Kuvendi i Maqedonisë, gjykatat vendore kanë rifilluar proçeset mbi dosjet të cilat ishin të paqëndrueshme para gjykatës ndërkombëtare, gjë që paraqet një precedent skandaloz në të drejtën ndërkombëtare. Proceduimi i këtyre dosjeve shpjegohet vetëm e kjo ndodh me ndërhyrje politike në gjyqësor dhe me arsyeshmërinë e mbajtjes së shqiptarëve në prehër me ninulla trushpërlarëse, por këta nuk e dijnë që shqiptari burrnohet që nga djepi.
Një rast tjetër aktual dhe skandaloz i ndërhyrjes së politikës dhe skenareve djallëzore në gjyqësor është rasti i Sopotit në të cilin 2 ushtarë të NATO-s dhe një civil humbën jetën në vitin 2003 dhe për të cilin u dënuan 11 shqiptarë nga fshati i Sopotit me gjithsej 156 vjet burg.
Sopotasit vazhdojnë të dergjen në burg përkundër deklaratave publike të dëshmitarit kyq i cili pohon pafajsinë e tyre që është konfirmuar gjithashtu edhe nga ish ministri i Mbrojtjes si dhe ish Ambasadori i NATO-s në vend bashkë me shumë të tjerë. Të gjitha këto të dhëna të detajuara mbeten në sirtaret e parlamentit dhe presin, si gjithnjë, pazarllëkun politik për pafajsinë e shqiptarëve të dokumentuar në qindra fletë. Përderisa çdo ditë e kaluar në moratoriumin e politikës ndëretnike në vend është ditë pazari, shqiptarët mund të risin vlerën e tyre politike vetëm nëse bashkërendisin veprimet dhe përkrahin njëri tjetrin sepse tashmë është e qartë se asgjë tjeter nuk kryen punë. Këtë e dëshmuam me njohjën e Kosovës dhe vendosjen e marrëdhënieve diplomatike, Falsiklopedinë e ASHAM-it, imponimin e gjuhës maqedonase, etj. Kur JEMI NJË, jemi të pamposhtur.
Sa kushton të jesh shqiptar në Maqedoni?

Gjykata Kushtetuese ka hedhur poshtë kërkesën e Lëvizjes qytetare ‘Zgjohu!’ për vlerësimin e kushtetutshmërisë së vendimit për ndërtimin e Kishës në Sheshin e Shkupit. Kryetari i Zgjohu Artan Grubi, tha se Gjykata Kushtetuese ka marrë këtë vendim, duke u bazuar në faktin se Qeveria truallin ku do të ndërtohet kisha, ia ka shitur Kishës Ortodokse Maqedonase. Pra, sipas Grubit, Gjykata Kushtetuese e ka marrë këtë vendim pasi që ka vlerësuar se toka, nuk i është falur Kishës Ortodokse Maqedonase. Nga Lëvizja ‘Zgjohu!’ paralajmërojnë se nuk do të heqin dorë nga vendimi për pengimin e ndërtimit të Kishës në Sheshin e Shkupit. Grubi paralajmëron se shumë shpejt do të ngrejnë një nismë të re të Gjykata Kushtetuese për të vlerësuar edhe kushtetutshmërinë e vendimit të Qeverisë për t’ia shitur tokën Kishës Ortodokse Maqedonase.

Lëvizja Qytetare “ZGJOHU!”, e mbështetur nga mbi 20 OJQ tjera shqiptare, dënon ashpër dhe e cilëson si të papranueshëm proektin "Shkupi 2014" të prezentuar nga Qeveria e Republikës së Maqedonisë nëpërmjet Komunës Qendër.
Pas 3 viteve me paralajmërime të njëpasnjëshme konstruktive dhe dashamirëse rreth rreziqeve që ndërtimi i kishës ortodokse në shesh do të nxis, Lëvizja ZGJOHU! konsideron që e gjithë përgjegjësia për përkeqësimin dhe radikalizimin e situatës do t'i takojë Qeverisë së Republikës së Maqedonisë dhe Komunës Qendër e cila me kokëfortësi vazhdon të provokojë shqiptarët dhe komunitetet tjera. Proekti "Shkupi 2014" ka për qëllim të nxitë urrejtje dhe ngjason me skenarin dhe temën e filmit 2012 të përkthyer në rrethana vendore.
Ky proekt i marrë që kushton miliona Euro nga buxheti shtetëror, do të nxisë tensione të paparashikueshme ndëretnike dhe ndërfetare, të pakrahasueshme me ato që i përjetuam për Enckilopedinë dhe imponimin e gjuhës maqedonase nga klasa e parë fillore. Andaj, ZGJOHU! i është drejtuar me një kërkesë konkrete të gjitha Ambasadave dhe organizatave ndërkombëetare në Maqedoni për përkrahjen e tyre në shmangjen nga një situatë e tillë pasi që do të ketë pasoja dhe komplikime të paparashikueshme për këtë vend në kohën më të rëndësishme për të ardhmën e vet.
Në rast se Qeveria nuk tërhiqet nga ky proekt, Lëvizja Qytetare “ZGJOHU!” do të ftojë Bashkësinë Fetare Islame dhe atë Katolike që të ngrejnë zërin lartë në shenjë proteste dhe të bojkotojnë konferencën botërore ndërfetare që do të mbahet ne Maj si dhe të na bashkangjiten në protesta masovike në Ohër gjatë kohëzgjatjes së konferencës për të demaskuar djallëzinë e Qeverisë.
Lëvizja ZGJOHU! konsideron që ky proekt është pika që ka derdhur kupën e diskriminimit dhe do të fillon konsultime me të gjitha OJQtë dhe partitë politike shqiptare rreth mundësisë që bashkarisht t'i ftojmë qytetarët në protesta si dhe të shqyrtojmë hapa tjerë për të penguar këtë proekt monoetnik dhe monofetar që nxit urrejtje.
Ky proekt nuk përmban asnjë element tjetër shtetndërtues të këtij vendi multietnik dhe multikonfensional përveq se atij maqedonas dhe përcjell porosinë "Një Maqedoni sa më Maqedonase" që është doktrina e vetme që udhëheq Qeverinë në 4 vitet e fundit. Kjo doktrinë nuk është në përputhje me realitetin, kushtetutën si dhe përcaktimet e deklaruara shtetërore për një shoqëri tolerante, multietnike dhe multikonfensionale që pretendon të anëtarësohet në BE dhe NATO.