zgjohu.com.mk | Lëvizja Qytetare ZGJOHU! - Shkup

Kultura shqiptare vazhdon të mbetet një nga sferat më diskriminuese. Edhe sivjet, shqiptarëve nuk iu nda as një për qind nga buxheti i Ministrisë së kulturës. Edhe ato pak projekte që kishin konkurruar në Ministrinë e Kulturës, nuk u miratuan nga kjo e fundit. Asnjëra projekt kapital nuk ka kaluar për kulturën shqiptare. Sipas ekspertëve i gjithë ky diskriminim bëhet, sepse shqiptarët kur hynë në Qeveri nuk hynë me një strategji për kulturën shqiptare, por i nënshtrohen zbatimit të projekteve të Qeverisë, të cilat ka vite që kanë për qëllim shkatërrimin e kulturës shqiptare dhe ndërtimin e kulturës maqedonase, ekzistenca e së cilës viteve të fundit është vënë në pikëpyetje. Profesor Reshat Ahmeti, thotë se shqiptarët trajtohen në ministrinë e kulturës, si macja nën sofër. “Meqë partitë politike shqiptare nuk kanë strategji për kulturën kur hynë në qeveri, atyre vetëm u japin diçka, sa për të thënë, njëjtë si maces nën sofër që i jepet një kafshatë bukë”, thotë ai.

Shqiptarët janë të diskriminuar në të gjitha sferat e kulturës. Edhe në artin figurative, ku situate duket pak më e mirë, pasi në konkurs mund të lexosh ndonjë emër shqiptari, sërish diskriminim është maksimum, pasi aty nuk ka asnjë projekt kapital. Muzika, botimet, teatri etj të gjitha janë të margjinalizuara. Artisti Blerim Grubi thotë se kemi një kulturë të arnuar. “Nuk duhet të vazhdojë më kështu. Për çdo vit situate në vend që të përmirësohet keqësohet më tepër”, thotë ai.

Ndërsa Lëvizja “Zgjohu!” do ti ftojë të gjitha institucionet kulturore të udhëhequra nga shqiptarët në një konferencë për të diskutuar diskriminim kulturor të prirë nga Ministra e Kulturës si dhe ndarjen skandaloze të mjeteve për kulturën shqiptare në vend. “Qëllimi jonë është që me fakte dhe të dhëna statistikore të demaskojmë politikat përjashtuese ndaj kulturës shqiptare dhe në këtë mënyrë të ndikojmë në arritjen e barabarësisë dhe marrjen e hises që na takon”, tha kryetari i Lëvizjes Qytetare “Zgjohu”, Artan Grubi.

Pas kësaj ata planifikojnë që ti informojnë ndërkombëtarët me atë që po behët me kulturën shqiptare. Gjendja e kulturës shqiptare është skandalozë edhe në pushtetin lokal. Në institucionet kulturore të Qytetit të Shkupit punojnë më pak se një për qind shqiptar.