zgjohu.com.mk | Lëvizja Qytetare ZGJOHU! - Shkup

Drejtuar: kompanisë ONE, Telekom Slovenia Group ONE shërbime telekomunikacioni AD - Shkup Blvd. Kuzman Josifovski Pitu 15 1000 Shkup

Lëvizja Qytetare “ZGJOHU!” e përkrahur nga dhjetëra OJQ tjera që janë pjesë e forumit tonë të shoqërisë civile, ka nderin t'ju drejtohet në lidhje me festën treditore me rastin e festave të fundvitit në qendrën e Shkupit, të mbështetur nga ana e kompanisë tuaj të çmuar.
Gjatë festimit të Vitit të Ri në sheshin Maqedonia, manifestim ky i mbështetur nga ana e kompanisë ONE, nga skena e vendosur në qendrën e qytetit nuk u ndëgjua as edhe një strofë e vetme në gjuhën shqipe. Një këngëtar i vetëm shqiptar në natën e parë, nga gjithësej tre netë feste, është abolutisht e pamjaftueshme dhe tendencioze. Në manifestimin qendror të natës së Vitit të Ri, asnjë fjalë e vetme nuk u shqiptua në gjuhën shqipe dhe kjo u reflektua në të gjitha lajmet në lidhje me festimin e Vitit të Ri në Shkup.

Duke marrë parasysh faktin që jeni rishtaz të ardhur në Maqedoni, na lejoni t'ju sqarojmë disa fakte shumë të rëndësishme. Sipas regjistrimit të popullatës më 2002, qyteti i Shkupit ka 506.926 banorë nga të cilët 104.000 janë shqiptar, duke mos i përfshirë këtu edhe komunat e afërta të Studeniçanit dhe Haraçinës. Ky numër e përcakton gjuhën shqipe si gjuhë zyrtare në gjithë qytetin e Shkupit. Gjithashtu, sipas nenit 5 të Kushtetutës të Republikës së Maqedonisë, gjuha shqipe është zyrtare në gjithë teritorin e shtetit. Na merr mendja që shqiptarët përbëjnë edhe një numër shumë të madh të klientëve të ONE.

Lëvizja Qytetare “ZGJOHU!” ju fton që të përballeni me faktet dhe numrat dhe të veproni ditë më parë në përputhje me realitetin dhe sankcionet ligjore në lidhje me gjuhën shqipe. Ju ftojmë që publikisht t'i kërkoni falje publike popullit shqiptar për lëshimin i cili besojmë të jetë i paqëllimshëm. Gjithashtu, kërkojmë distancim publik nga këngëtari Vlado Janevski dhe të kërkoni nga ai që të kërkojë falje për nënçmimin publik dhe shprehjen e urrejtjes ndaj shqiptarëve nga po ajo skenë. Të njejtën e presim edhe nga qyteti i Shkupit. Për në fund, presim që dygjuhësia do të bëhet zbatohet edhe në gjithë komunikim e ONE me klientët dhe publikun në Maqedoni.

Jemi thellë të bindur që do te merrni parasysh reagimet tona të nxitura edhe nga reagimet e qytetarëve shqiptar të revoltuar nga ky diskriminim kulturor që sa vjen e shtohet. Ju ftojmë në bashkëpunim dhe bashkarisht t'i përmirësojmë këto gabime me qëllim që artistë me agjendë politike si Janevski e të tjerë të mos gjejnë mbështetje në kompani publike dhe institucione shtetërore sepse ndryshe këto subjekte identifikohen me qëndrimet e pseudoartistëve të tillë.