zgjohu.com.mk | Lëvizja Qytetare ZGJOHU! - Shkup

Në vigjilje të shpalljes së konkursit të servisit publik TVRM për këngën përfaqësuese të Maqedonisë në festivalin Eurovizion, Lëvizja Qytetare “ZGJOHU!” dhe Shoqata e Artistëve Shqiptar në Republikën e Maqedonisë dorëzojnë propozimin vijues deri të servisi publik TVRM për të evituar diskriminim shumëvjeçar në përzgjedhjen e përfaqësuesit të Maqedonisë në Eurovizion.

Lëvizja Qytetare “ZGJOHU!” dhe Shoqata e Artistëve Shqiptar në Republikën e Maqedonisë reagojnë me kohë me qëllime të sinqerta për t'a shmangur përsëritjen e gabimeve të konkursit të vitit të kaluar për përzgjedhjen e këngës për Eurovizion të shpallur më 26 nëntor 2008. Konkursi i përmendur thekson që kusht për pjesëmarrje në garën është këndimi vetëm në gjuhën maqedonase. Lëvizja Qytetare “ZGJOHU!” dhe Shoqata e Artistëve Shqiptar konsiderojnë që ky kusht është skajshmërisht diskriminues për artistët shqiptar në Maqedoni për arsye se:

- Gjuha në muzikë është mjet për shprehjen e botës emotive dhe artistike të kompozitorit, poetit dhe performuesit. Parashtrimi i kushteve të këtilla paraqet kufizim për krijimtarinë e autorëve të caktuar dhe rrjedhimisht kufizon edhe produktin final (këngën).
- Konkursi ndeshet me karakterin multietnik, multikulturor dhe karakterit kushtetues dygjuhësor të Republikës së Maqedonisë.
- Konkursi nuk është në frymën e Eurovizionit që promovon vlerat multikulturore të Evropës.
- Ky kriter diskriminues kufizon artistët shqiptar për të konkuruar në festivalin me këngë të kënduara në gjuhën e tyre amtare.
- Parlamenti i Republikës së Maqedonisë miratoi ligjin për përdorimin e gjuhës shqipe me çka gjuha shqipe është gjuhë e dytë zyrtare në qytetin e Shkupit dhe Republikën e Maqedonisë.

- Festivali “Shkupi Fest” është në kuadër të servisit publik TVRM për të cilin kanë dhënë kontribut edhe pjesëtarët e komuniteteve tjera etnike në Maqedoni, andaj servisi publik duhet të reflektojë barabarsinë reale multetnike dhe jo të promovojë selektivitet etnik.
- Redaksia muzikore e “Shkupi Fest” dhe statuti i festivalit duhet t'i adaptohen realitetit të ri të Maqedonisë si dhe ndryshimeve ligjore në lidhje me përdorimin e gjuhës.

Apelojmë deri te TVRM dhe “Shkupi Fest” që mos të kufizojnë performancën e këngëve vetëm në gjuhën maqedonase, por t'iu mundësojnë edhe artistëve tjerë që të konkurojnë duke ia mundësuar publikut që të vlerësojë kualitetin e këngëve duke mos i diskualifikuar ato para fillimit të festivalit.

Shpresojmë që redaksia muzikore e servisit publik TVRM do të reagojë pozitivisht ndaj këtyre propozimeve që do ta begatonin krijimtarinë e këtij festivali sepse dallueshmëria është përparësi dhe jo pengesë për zhvillimin e artit muzikor në Maqedoni.

Lëvizja Qytetare ZGJOHU! mirëpret vendimin e Akademisë së Shkencave dhe Arteve të Maqedonisë për të shkarkuar redaktorin e enciklopedisë skandaloze Bllazhe Ristovski.

ZGJOHU! gjithashtu përshendet distancimin e ASHAM nga zërat e kontestuara dhe shpreh bindjen që redaksia e re do ta shfuqizojë si tëpavleshme enciklopedinë dhe do të merr vendim për përpilimin e enciklopedisë së re me përfshirje të ekspertëve shqiptar për çdo lëmi.

Se si do të bëhet korrigjimi i enciklopedisë dhe cili do të jetë fati i Bllazhe Ristovskit dhe redaktorëve të tjerë të enciklopedisë së debatueshme do të dihet nesër kur do të mblidhet Kuvendi i Akademisë së Arteve dhe Shkencave të Maqedonisë. Muzafer Bislimi nga Instituti i Historisë Nacionale dhe përfaqësuesit e ‘Zgjohu’ kërkojnë shkarkimin e Ristovskit dhe të redaksisë si dhe tërheqjen e projektit akademik.
“Nëse nuk tërhiqet plotësisht enciklopedia dhe nëse nuk ndryshohet redaksia atëherë të gjitha institucionet që kanë të bëjnë me kulturën dhe shkencën shqiptare në Maqedoni, mendoj për Institutin Albanologjik në Shkup, USHT, Shoqatën e Historianëve, e kanë për detyrë që të krijojnë një redaksi, domethënë ne shqiptarët ti përvishemi punës që vetë të bëjmë një enciklopedi”, theksoi Muzafer Bislimi nga Instituti i Historisë Nacionale në Shkup.
Nga Lëvizja Qytetare ZGJOHU thonë se duhet të shkarkohen hartuesit e Enciklopedisë, që ngjalli reagime tek Shqiptarët dhe disa ambasada të huaja në Maqedoni.
“Zgjohu vazhdon të qëndrojë në kërkesat e veta që janë të njohura për opinionin siç janë dorëheqja e enciklopedisë, shkarkimin e këshillit redaktues në krye me Bllazhe Ristovskin poashtu edhe distancimin e ASHAM-it nga Këshilli redaktues dhe nga ky projekt skandaloz siç ishte duke dëshmuar vetveten si një institucion serioz”, tha Teuta Zllatku, përfaqësuese e “ZGJOHU”.
Kryetari i ASHAM-it, Gerogi Stardellov, para disa ditësh ka deklaruar se ky institucion po punon përmirësimin e pjesëve kontestuese të Enciklopedisë, duke iu përgjigjur kështu akuzave se ASHAM hesht pas skandalit me Enciklopedinë.
“Nga jashtë duket se në ASHAM mbretëron qetësia, por megjithatë nuk është kështu. Prej 10 ditësh ka debate intensive për Enciklopedinë Maqedonase në departamentet e ndryshme. Bëhet ekspertiza profesionale për çdo kapitull, departamenti i arteve shqyrton artin, ai për shkencat matematiko-natyrore shqyrtohet nga departamenti përkatës dhe kështu me radhë”, është shprehur Stardellov.